MARTANDANG-1 (Upa Ni Pambahenan)

Upa Ni Pambaenan? (Martandang 1/10)

Di bus Sampri do hutanda boru Pardede nauli on. Sabangku hami di bus tikki i mulak sian Medan tu Sidikalang topet libur kuliah. Dang na kebetulan hami sabangku. Naung jolo hulean do sigaret ni petugas loket Sampri i asa dibaen au di lambung ni itoan i. Goarna pe usaha ate?

Tolu halak hami sabangku hatiha i. Au, ibana dohot sahalak oppung-oppung naung matua. Namatua i ma disuru boru Pardede i di tonga-tonga daba. Jut hian rohakku. Attar ramah hian ma pambahenanku tu namatua i ala hurippu apala oppungna. Mambuat roha, ninna rohakku. Alai dung huboto naso oppungna namatua i, sai huhapithon ma oppung i daba. Asa mangido pinda hundulan ibana tu pinggir ninna rohakku. Sibolis namartanduk i ma ra nasai manjujui au ate? Wakakakakak

Nungnga satonga jam pardalanan ni bus, satonga jam muse ma hami makkata-hatai dohot boru Pardede i. Berarti, satonga jam musema nasai huhapithon inanta namatua i. Sipata hubege do hosa ni inanta i mallingik-lingik tikki huhapithon. Ngiiikkk... ngikkkkk.. ninna. Jut rohakku ala so berhasil carakku papinda inanta namatua i tu pinggir. Alai lobi jut hian dope huhilala ala toppu muta-uta inata i. Use ma sude uta-utana tu abinganku. Hira na disengaja daba. Bau tolor muse. Puehhh.... Tung apala hatopma dapot au upa ni dosakku ate?

Dang holan i dope. Gabe laos pinda muse do boru Pardede i dao tu pudi daba. Hami nadua ma tinggal di bangku i. Huida muse ma tu pudi, alamak... doli-doli  muse donganna sabangku. Gurgur ma huhilala mamereng namatua on. Jujur daba, santabi saribu hali santabi, naeng hupokkik tikki i. Alai toppu musema ibana pingsan jala sande tu andorakku. Pasma hira na ibana hallethu daba. Hira film India ma tutu. Hugeser pe inanta namatua i, dang bergerak be. Panik ma hami sabus jala maradian ma ala ni namatua on. Atikna disengaja do i asa hubaen pernapasan buatan tu ibana? Olo ma annon pinda mera ni napuranna i tu bibirhu? Ah.. daong ah... Di ibana ma songgotna molo pola do au disuru mambaen napas buatan.

Dung dibaen supir i miak angin tu parnianggoan ni namatua i, sadar ma ibana alai lemas pamatangna. Sai mangunsande ma inanta namatua i tu au. Sahat tu Sidikalang ma inanta namatua i huabing jala hudappol-dappol. Dung sahat di Sidikalang, maridi ma au di sada rumah makan. Segar ma huhilala. Apalagi ma huingot hata ni boru Pardede andorang so marsirang pardalanan hami. "Toho da, ikkon ro do ito tu jabu nami!" ninna hira namangelek. Huhhuy....... (Bersambung)