MARTANDANG-2 (Hinauli Ni Nauli)

Hinauli Ni Nauli (Martandang 2/10)

Nungnga holom ari tikki sahat au di huta. Songon na somal rupani, dung sidung mangan, makkata-hatai ma au dohot natua-tua i taringot tu perkuliahanku dohot akka na asing. Ala tinggal dohot oppungku do au, molo hudokkon pe natua-tua i, berarti oppungku do maksudhu. Nalomoan roha ni oppung dolikku molo nga makkatai hami. Sude do luat ni portibi on dihatai hami. Diboto oppungku do bahasa Belanda, bahasa Inggris dohot bahasa Jepang. Namalo do anggo oppungku nangpe holan tamat HIS ibana jala pejuang kemerdekaan. Ido asa sai lomo rohana makkatai dohot au. Alai molo oppung borukku, sai holan tu anggina mangulaki ido rohana. Sai dipassosotton ma au tu boru ni paramanna, hatiha i. Molo nga mulai ditaringoti soal paribanku, pittor habang ma au sian jabu. Tu lapo tuak ma au marende.

Pandok ni dongan sahuta, tarlumobi pelanggan ni pakter, sai tamba do ribur ni huta nami molo tikki mulak au. Alai ima, resiko na pe adong do. Marmagoan ma manuk ni halak molo nga di huta au. Wakakakak... Alai dang na au manakko i. Anak ni ampunasa manuk i do husuru mambuat sandiri. Sai di lapo i do diseket hami manuk i baen tambul ni tuak. Apalagi borngin on, pas malam minggu. Jolo mordong do hami asa lao tu partandangan. Asa songon na garang, ninna akka dongan. Molo au, torus do garang makkatai tu jolma apalagi ma tu anak boru. Haru begu, molo adong begu nabagak, ikkon hutandangi. Asa hubaen maranak begu i.

Dung suda tuak di pakter i, borhat ma hami tu huta bariba lao martandang. Diboan hami do gitar jala marende ma hami huhut mardalan pat. Tanjakan dengan elevasi 45 derajat do dalan tu huta bariba i. Satonga dalan dope hami, nga hitir-hitir be dugul-dugul alani lojana. Lumayan dope molo adong anak boru nabagak di luat i. On? Pittor bohama bagak ni parhuta-huta oppungeh? Paling akka na giman adong di son, ninna rohakku. Kulitna pe pasti sisik-sisikon manang na daringon. Hosana pe pasti bau hira hosa ni ulok. Alai holan di bagas rohakku do daba.

Hosa-hosa dope au topet sahat hami di huta i. Gottinghu pe hira namaponggol ala ni loja na. Nang pe bulan di langit mansai torang, anggo rohakku nungnga tung mansai golap be. Pittor sai hupikkiri ma muse annon lao mulak tu huta nami. Manolsoli au dohot tu huta on nangpe semangat 45 akka dongan i. Burs......

Eitss... dang hutorushon be hatakku dung huida mamolus tolu halak anakboru. Nangpe samar ala holan bulan namanondangi, anggo bau ni anakboru i nga taranggo au be. Dipakkulingi donganku naung mananda nasida ma anakboru i. Naramahan daba. Isss...

Ditogihon anakboru i ma hami tu sada jabu di huta i. Adong namelek-melekan ala baru sorang dakdanak di nasida. Torop jolma namaranggap di si. Adong muse namarjokker karo. Pakke lampu gas do di jabu na melek-melekan i. Dang adong dope listrik uju i. Dangol hian kan?

Ala adong lampu gas di alaman ni namelek-melekan i, takkas ma huida anakboru natolu nakkin. Hundul nasida di alaman dohot donganhu. Lumayan, manis do hape nasida. Alai, nga bagian ni dongan be i, lokma holan nasida marhallet, ninna rohakku. Hupapodom ma di emper on. Asa adong gogo muse mardalan lao mulak tu huta. Loja hian daginghu nasai dipangunsande oppung nakkin di bus Sampri. Hira na huabing nama nakkin. Tamba muse do tabona modom molo dung minum tuak. Rengezzzzzzzzzzzzzzzzz

Angon-angon, hubege ma suru-suruan marende di lambungku. "Berarti, nga di surgo hape au?" ninna rohakku. Alai boasa ende ni Ratih Purwasih ende di surgo? Inginnya Begini Jadinya Begitu, ima judul ni ende na. Merdu hian suarana. Alai boasa adong muse soara ni baoa donganna duet? Adong do tahe suru-suruan baoa? Hira soara ni donganhu si Saut? Ah, hupatakkas majo. Ido soara ni si Saut do.

"Sip ma ho di si, Saut!" nikku manonggak si Saut. Dungo ma au alani soara ni si Saut na hira soara ni bagudung na tarhapit i. Hudanggur muse ibana dohot solop. Dang hona patna, tanggurungna do hona.

"Ageh?" sappat mudarhu. Tarsonggot hian au mangida anakboru dongan ni si Saut na marende i. "Sadihari madabu bidadari tu huta on?"

Humalaput ma au hehe sian podomanku. Hudadapi sakku ni salawarhu naeng mangalului suri nangpe so hea hian au manuri gonjeshu. Huatur ma gayakku sambil hupikkiri ma manang aha nalao sidohononku mamukka partinandaan tu bidadari i. Hudapothon tu lambungna.

"Nga dungo, ito?" ninna manurdukhon tanganna. Marsijalangan hami jala hudokma margakku.

"Simanjuntak. Alfian Damara Simanjuntak!" nikku. Gugup hian au mandok marga dohot goarhu lengkap hian. Tarhatotong ma au mamereng uli ni itoan i daba. Sai hupanotnoti ma pamanganna tikki paboahon goar dohot boru aha ibana. Eh...eh.... Maradu sohuboto manang boru aha nakkin didok ibana. Asal ma boru-boru, ninna rohakku muse. Wakakakkaka

"Pette satokkin, dah. Asa hubuat kopimu!" ninna. Mate ma au... Nga uli rupana, uli muse dohot pambaenanna. Manolsoli ma au naung jumolo manuhati andorang so patar. (Bersambung)