Janji (Martandang 9/10)

Janji  (Martandang 9/10)

Daripada mamereng bohi ni  si Saut nasai curiga, tumagon ma au mamereng bohi ni si Pinta namardalan di hambirangku. Hupangido asa au mangonjar kareta ni Ompungna i sahat tu ruang inapna. Alai dang olo Ompung i molo pintor masuk tu kamar. "Boan majolo au tu taman, Amang. Satokkin nari pe!" ninna mangelek. Hubereng tu si Pinta mangido pendapat, mangunduk ibana huhut mekkel. Huboan ma Ompung i manghaliangi taman ni rumah sakit i. Di tikki namardalan di taman i ma au makkatai dohot si Pinta. Las rohakku umbege ibana makkatai. Pandokna, lomo rohana mambege radio molo tikki au siaran. Dang taralo Abang makkatai di telepon, ninna. Mekkel-ekkel hami di taman.

Alani namangonjar kareta ni Ompung on, gabe huingot ma au tikki dakdanak mangonjar beko sampe marunggang jala magulang happa muatanna i sude tu rura. Marguling-guling ma sahat tu toru adui. "Inangoi... inong...!" ninna happa i sian rura. Eh, boasa boi happa marinagoi, ninna rohakku ma. Hape, si Mawan do sada namagulang tu rura.

"Dang gomos attong ditiop ho beko i," nikku manalahon si Mawan asa unang sampe tangis ibana.

"Hurang gomos boha dope? Gari happa nga ditali jala nga huhunduli, tong marrugean dibaen ho?" ninna huhut paganjang muncungna.

"Nakencangan attong dibaen ho!" ninna huhut dipaias ibana dugul-dugulna. Hupaias muse ma akka bulung-bulung nalokkot di karitingna i alai dijua ibana do. Mardandi ibana. Naeng hutarikkon do nian kariting mosokna i. Alai nga asi hian rohakku mamereng pargulangna nakkin. Memang songon happa i nama nakkin huida pardanggurni ibana sian beko i margulang-gulang tu rura. Hape si Mawan i do nakkin mangido asa hutancap mangonjar beko i.  Heheh...

"Boasa mekkel, Abang? Adong na geok?" ninna si Pinta huhut mamereng jam tanganna. Dung dibaen si Pinta isyarat, huonjar ma Ompung i tu ruang inapna. Di ruang inap i, nga jongjong sahalak ina-ina namokmok. Nantulang, omak ni si Pinta. Sai dibereng Nantulang i tu obukhu naganjang. Sinis...

Dung huangkat hami Ompung i tu podomanna, marsitandaan ma hami dohot Nantulang i. Sai diurupi si Pinta ma au patandahon dirikku.

"Boru aha ma namanubuhon hamuna?"

"Boru Manalu, Nantulang!"

"Boru Manalu? Inang simatuakkon pe boru Manalu do. Maruda do ho tu bapa ni si Pinta. Berarti...?"

"Marpariban do au tu si Pinta!" hatop hian attong hualusi.

"Daong, bah? Mariboto do hamuna. Tu inang simatuakku do hamu marpariban!" ninna Nantulang i gomos.

Mandok sipiga do Nantulang on? Hira nanaeng patoho-toho onna iba tu namatua on hape adong dope naposo? Daong, ikkon paula so huboto maksudna asa unang hujonoki si Pinta. Ikkon hualusi torus, ninna rohakku. Dang parcuma iba nagartip makkatai di radio. Molo porlu, marsijanggolaan pe aloon do ina-ina. Wakakakak

"Lima sundut marturut ma hami dipompar boru Pardede, Nantulang! Ompungku ma terakhir namarboru Pardede. Torop do paniaran nami boru Sonak Malela. Haru bapakku pe dialap do boru Napitupulu!" nikku.

"Hah? Nakkin didok ho boru Manalu? Dia do natoho?"

"Toho do duassa, Nantulang. Namanubuhon au do Boru Manalu. Molo istri ni Bapa saonari boru Napitupulu do!" nikku huhut pamanat bohi ni Nantulang. Hm, lam busisaon ma Nantulang huida dung hupaboa nasongoni keluargakku. Huida digoit Nantulang i si Pinta.

"Ido, Omak. Toho do nidok ni Abang on. Molo pas siaran tonga borngin pe sai dihatahon ibana do i," ninna si Pinta. Tuani ma didok si Pinta songoni, ninna rohakku.

"Maksudmu?" ninna Nantulang. Diangkat salibonna gabe hira garis na digoreshon.

"Ido, Nantulang. Ala naung huboto ma dangol ni keluarga namarsirang asa ikkon manat au mangalului anakborunalao donganhu sahat tu na saur matua!"

Marhosa ganjang Nantulang i dung hudok hatangku. Nga minar huida pamerengna tu au. Lam godang ma disukkuni Nantulang i taringot au. Semester piga, jurusan aha, piga sekeluarga, kost didia, sadia dikirim balanjo, aha cita-cita, hobby, bakat dohot naasing dope. Sai mekkel-ekkel muse dope Nantulang i ala hupaboa partinandaanku parjolo sahali, di bis Sampri, dohot si Pinta boru sasada na i. Godang dope nahuhatai hami maradu tarlalap hape nga borngin.

Kaluar sian kamar, leleng dope hami makkatai dohot Nantulang di pintu. Gomos do hatana mandok asa huajar-ajari si Pinta. Pos rohakku halak naburju do ho, ninna Nantulang i.

"Pahatop i, Bang!" ninna si Pinta naung paimahon di jolo.
 Gomos au dohot Nantulang marsijalangan. Lobi sian gomos ni jalang-jalang nami i ma hami masiberengan, marjanji di bagas roha.

Marikkat ma au mandapothon si Pinta naung tarpaima lao mulak tu jabu. Nantulang i do manjaga Ompung borngin on paima mulak sogot tu jabu ala naung diloas dokter.
 Hubuat rantang kosong na di tanganna asa au mamboan. Dung hutaruhon annon tu jabuna, naeng ro dope au tu rumah sakit on asa rap mulak hami tu huta dohot si Saut.

"Beta tapaboa jolo tu si Saut asa dipaima au annon mulak tu huta!" nikku manogihon si Pinta tu kamar ni si Piter dirawat. Dihapithon si Pinta tanganhu hambirang. Sahat do tu pintu kamar ni si Piter au digandeng. Nga hundul si Piter. Mangan ibana disulangi Omakna. Jonok di lambung na i, hundul si Tiar. Dipaboa si Marudut, anggi ni si Saut tu si Paulina. Dipaboa si Paulina ma muse tu si Tiar. Ido asa ro ibana. Sai didampoli si Tiar pat ni si Piter. Hubereng sai dipanotnoti si Tiar bohi ni si Piter. Hira namarjanji do anggo pamerengna i.

"Hundul ho, ito Pian. Suru halletmi nabagak i hundul!" ninna Omak ni si Piter. Dipalua si Pinta ma tanganna na sian nakkin manggandeng au. Marmera huida bohina. (Bersambung)

Piter Oh Piter (Martandang 8/10)

Molo Rokkap (Martandang 8/10)

Tancap gas ma hami mulak sian partandangan. Ndang mulak tu huta hami alai manigor tu ladang ni si Saut do mamereng durian na madabu. Holan sahat hami di sopo, pittor sigaret ni si Marudut do diroro hami. Ibana do torus manjaga durian di ladang on. Di sopo on muse ma ibana mangaloppa. Diukkap si Saut ma hudon. Adong dope indahan. Dibereng musema kardus, adong dope mie instan. Nga mantap be on, mulak martandang memang sai male-male do iba. Hubola hami muse do durian akkup ni indahan. Sodap do sude molo nga di ladang tahe. Butong.

Alani butongna ma deba umbahen na pittor galdap hami modom. Nga ginjang ari asa dungo hami. Ditinggalhon si Marudut hami nadua di sopo i laho mamboan durian tu huta. Kopi nami pe nga ngali be.

Naeng saburma kopi na huinum ala toppu ro gasa-gasaon si Marudut marsepeda moto. Hira na diambolongkon nama sepeda motor ni si Saut i di durame ni eme i.

"Pahatop hamuna mulak!" ninna si Marudut marsurak.

"Manikkot si Piter!" ninna muse huhut hosa-hosa marikkat mandapothon hami tu sopo.

"Si Piter??" rappak hami nadua mandok. Longang, masiberengan ma hami.

Rap marikkat ma hami tu sepeda motor naeng pangolu sepeda motor. Pola do marsitomboman ulu nami alani humalaput nami. Ujungna mengalahma au, husuru ma si Piter mamboan sepeda motor i. Habang ma hami lari saribu sian tonga-tonga ni ladang i mamotong dalan. Hira na hornop nama panghilalan nami di akka bogas panabian ni eme i. Sipata naeng danggur do hami. Eh... saut do hape danggur. Tuani do tu durame na purguk i. Suruk do ulu ni si Saut.
Dipajongjong hami ma muse sepeda motor on. Dang lari saribu be hami. Boha baenon lari saribu? Mangonjar nama. Mangonjar sepeda motor nahabis bensin.


Dung sahat hami di huta, huida hami ma nga torop jolma di jolo jabu ni halak si Piter. Hubege hami omakna sai mangandungi. Natoropan jolma di pintu ni jabu i maradu maol hami masuk tu jabu lao maereng si Piter. Di pintu dope hami alai nga disuru hami kaluar. Naeng diboan si Piter tu luar.

"Nga ro be motor ni si Jumaliang, ta pahatop ma!" ninna sahalak ama-ama. Heppot ma nasa jolma na adong di si lao mangurupi manang aha naporlu siurupan. Hubereng hami ma si Piter dipamasuk tu motor i. Pingsan dope ibana. Diboan bapana musema botol putas na niinum ni si Piter i asa diboto dokter Puskesmas laho mambaen pertolongan medis. Sude isi ni huta manaringoti si Piter namanginum putas.

"Ai mangolu dope hape? Hurippu nakkin nga mate?" ninna si Saut. Hudoltukkon muse ma uluna. Alai dang hona ala mangelak ibana.

"Toe, hamuna naposo i, ihuthon hamu ma tu Puskesmas atik boha porlu pangurupion muna!" ninna sahalak natua-tua ni huta.

Pittor marikkat muse si Saut mandapothon sepeda motorna. Sai diengkol ibana ma sepeda motorna on alai ndang marnamangolu. Dia ma boi mangolu? So na diisi dope bensinna. Ibana do mangonjar-onjar mulai sian ladang sahat tu huta, alai ndang diingot ibana be i. Molo manurut pandapothu, tumagon hian dope si Saut on namanginum putas i daba. Asa moru akka na oto sian portibi on. Alai molo mate ibana, gabe moru muse ma annon bilangan ni naburju. Attong, tapasombu ma ibana mangolu, ate?

Mangolu ma sepeda motorna dung diisi bensinna. Alai ndang dohot be ibana manaruhon tu Puskesmas ala naung adong tolu halak doli-doli namangihuthon motor i. Meret ma hami tu lapo.

"Molo manurut ho, adong do hubungan ni kejadian on tu si Tiar?" ninna si Saut manukkun au.

"Olo do!" nikku mangalusi ibana huhut martukkol osang.

Hohom si Saut. Ditatap ibana tu dolok adui, tu huta Lau Pakpak, huta ni si Paulina. Au pe gabe huingot musema bidadarikku si Lasma. Torop do anakboru nauli donganku di Medan, alai on dope huhilala namambaen au masihol. Ondope anakboru namambaen boi au mangalupahon si Diah, si Nelly, si Lince, si Mawar, si Priskila dohot ise dope tahe?

Ciittt...!!! Direm si Luhut, anggi ni si Piter, ma sepeda motorna di jolo ni lapo na di jolo jabuna i. Sude pangisi ni lapo manukkun si Luhut manang naung boha si Piter.

Parah do haroa asa pola ikkon diboan dongan nami i tu Sidikalang marubat. Dung dipapungu si Luhut pahean dohot na porlu boanonna, borhat ma ibana muse tu Puskesmas Tigalingga laho dohot mamboan si Piter tu Sidikalang.

Dung borhat si Luhut, tubu ma tu pikkiranku asa dohot manaruhon si Piter. Hutogihon ma si Saut. Habang ma hami lari saribu. Dang adong be nasida di Puskesmas. Pandok ni piket i, nga borhat tu Sidikalang anggo pasien si Piter. Hami pe attong menyusul ma menuju Sidikalang.

Tung nahatop ma motor i mamboan nasida, laos so pajuppangnami nasida di dalan. Hape nga lari saribu hami. Sahat ma hami tu rumah sakit Sidikalang. Husukkun hami ma panjagana. Dang adong dope pasien namargoar songoni, ninna panjaga i. Maila huhilala. Ala ni ilakku, nga naeng husuru si Saut minum putas asa adong sidalianku masuk tu rumah sakit i.

Tep, huida hami ma nga ro nasida. Didorong ma si Piter masuk tu rumah sakit. Dang sadar dope ibana. Asa hami pe parjolo sahat tu rumah sakkit, na jolo mangisi bensin do hape nakkin motor nasida i.

Nga botari asa sadar si Piter. Molo pandok ni si Luhut, na dibaen-baen do i deba, ninna. Na adong do sipangidoanna tu natua-tua i, alai ndang dilehon. Mangido sepeda motor ibana, ninna muse. Songon na hosom do soara ni anggi na i.

"Hurippu alani si Tiar," ninna si Saut onjom. Alai dang pola be hutanggapi ala nga mondok-ondok au. Hupatoltolma pathu hundul di taman ni rumah sakit i. Hupapitpit matakku satokkin. Tarhilala  iba mangulon nanggo apala satonga jom.

"Oi, Pian. Dungo ho, adong anakboru nabagakan!" ditarik si Saut pinggolhu. Hassit hian. Alai dang alani hansit na i asa pittor bollang au. Alani anakboru nidok na i do.

Adong sahalak anakboru manogu-nogu sahalak namatua mamolus di jolokku.  Sai hupulos ma matangku ala dang porsea au di pamerenghu.

"Pinta!" nikku majouhon goar ni anakboru i.

"Bang Pian!" ninna lam hatop mangonjar kareta tu lambunghu. Ketawa-ketiwi ma ibana maukkun kabarhu. Las hian rohana paboahon tu oppungna na donganna au. Hupaunduk ma bohikku asa takkas au mangida bohi ni oppung i.

"Penyiar radio do Abang on di Medan, Oppung!" ninna manambai.

"Nion si Saut donganku, marsitandaan jolo hamuna!" nikku huhut manopak tanggurung ni si Saut.

"Saut!"

"Pinta. Pinta Pardede!"

Sai tarhatotong dope bohi ni Saut marnida uli ni si Pinta. Olo do ra haidaan mabaor kopi molo diinum itoan i ate, ninna si Saut alani bontar ni si Pinta diida ibana. Sai dibereng ibana ma tu boi ni si Pinta marganti soli tu bohikku. Tong hira na curiga ibana mamereng au. (Bersambung)

Alusi Au Lasma (Martandang 7/10)

Alusi Au Lasma (Martandang 7/10)

Lam bagas borngin, lam ngali ma nang pangullus ni alogo. Pola humitir osang niba jala makkutur dugul-dugul niba ala ni ngalina. Holan onom halak nama hami di emper ni jabu on. Si Saut nga margulasai di suhi-suhi adui. Si Tiar dohot sidoli pangganti ni si Piter kalam-kalam dope di toru ni kembang sepatu. Au mangunsande tu tiang ni emper alai huhut mamuhung alani ngalina. Hupadomu ma osangku tu dugul-dugulhu. Nga hira tanggiling au huhilala ala ni ngalina. Manorus nang tanganku. Apalagi ma pinggolhu, soinama ngalina, nga hira es. Brrrrr....

"Ngali hian ari on ate, Bang?"
"Imadah, hape nga marjakket iba, tong manorus," nikku mangalusi.

Hinsat ibana sian hundulanna lao masuk tu jabu.

Marjakket ibana kaluar sian jabu. Diboan ma mandar na rara jala dilean tu au. "Pakke mandarhon asa unang ngalian ho!" ninna. Jala ibana do manurukhon mandar i sian simajujunghu tu pamatangku. Lasma huhilala, songon goarna i.

"Sapala, pinda ma hita nadua tu jabu, beta," ditogihon au. Au pe hinsat mangihuthon bidadari nalagu i. Naeng hundul au di kursi alai disarathon ma tanganhu asa dohot au tu dapur. "Dongani ma au mangaloppa aek las, asa  hubaen kopi di hita" ninna.

Masisulu ma hami nadua di tataring pangalompaan i. Hupajonok telapak ni tanganku tu api na mohop i. Molo dung mohop, hubaen ma telapak ni tanganhu tu pinggolhu dohot tu bohikku. Marjillam-jillam api i sipata dais tu telapak tanganhu alani gorgorna. Alai dang sadia gorgor ni api i molo hupatudos tu gorgor ni rohakku marnida si Lasma. Burju na i, lagu na i nang lambok ni hata na i ma namambaen au hira na disihir. Malo muse marende nang margitar.

"Boha do alusmu tu hatakku nakkin, Las?" nikku manatap matana. Tio hian pamerengna maradu haidaan jillam-jillam ni api i di matana.

Sip ibana.

Husurdukhon muse soban tu gara ni api i huhut paima alusna. Tong dang dialusi alai huida ibana manarik hosa ganjang. Ditailihon tu au. Mansai nanget ibana manaili tu au. Diharat ibana sisilonna. Au sai tarpaima di soarana. Dungi habegean ma soara ni aek las naung gurgur, hinsatma ibana sian hundulanna mambuat kopi dohot gula. Diparade ibana ma kopi nalao inumon nami. Meret ma au sian dapur tu kursi di ruang tamu. Hundul sasada au di si pima ro ibana sian emper manaruhon kopi ni dongan nami.

"Tabo hian do hubege endemi, Bang. Muba do tabo ni ende molo niendehon sian nasa roha niba, ate?" ninna nanget hian di pinggolhu. Solhot hian ibana hundul di hambiranghu. Aturanna, lam las ma nian panghilalaanku. Boasa ngali huhilala hata ni si Lasma on. Hubereng ibana unduk. Hupasisi obukna asa tangkas huida bohina. Mangunsande ibana di kursi i jala marhosa ganjang. Tung borat hian do haroa dihilala mangalusi hatakku na di ende i.

"Huboto do dang taralusanmu dope hatakki, Las," nikku huhut maniop telapak tanganna. Dipasombu hutiop tanganna. "Adong dope ari sogot manang haduan. Molo tung pe songon natarhipu-hipu au mandok hatakku jala mangido alusmu, ala holong ni rohakku do i, Las. Unang pola pikkiri be i, pos do rohakku nalao alusanmu au sogot manang haduan."

Mangunsande ma ibana tu abarakku. Hutiop dope tanganna. Eh, ibana nama hape maniop tanganhu.

"Sadari dope au marsitandaan dohot Abang, alai panghilalanku nga hira na sataon hita mardongan."

"Unang hansit roham da, Bang? Nangpe so pittor hualusi hatami, da?" ninna manambai hatana alai sai huhutma ditiop tangan hambiranghu. Gomos ditiop.

"Unang sip ho, Bang. Mabiar au molo sip ho," digalmit hurumhu.


"Beta di luar ma hita makkatai!" nikku hinsat sian hundulanku. Ditarik tanganku asa sai hundul au.

"Namuruk do ho kan, Bang?" gogo ditarik ibana tanganku laos pellet muse ma au hundul.

"Daong. Ai na bohi parmuruk do diida ho bohikku?" mekkel suping au alai dang sian rohakku.

"Pahundul majolo di lambungkon, Abang ganteng," ninna. "Makkatai jo ho, Bang. Nalomoan rohakku mamereng ho makkatai. Siuk Abangku namalo margitar, namalo marende, namalo makkatai, namalo di sude ma tahe. Siuk?" ninna huhut maniop hurumhu. On dope husadari na di hurumhu do hape kelemahanku. Mekkel ma au sian rohakku. Tutu do sian rohakku namekkel i. Namalo pe au, alai ummalo do ho mambuat rohakku, nikku di bagasan.

Dipangido ibana ma asa huceritahon akka sibaen namekkel. Huceritahon ma dongan nami si Urdot, molo goar sasintongna si Radot do, na gabe hurang roha alani namarhallet di Bandung tikki kuliah. MAte toppu halletna di abinganna topet marsiummaan nasida. Pandok barita, alani bau ni hosa ni si Urdot ma asa mate hallet na i. Huceritahon musema na hea sahuta dioto-otoi ibana taringot makkail. Dirippu parhutanami toho dibaen ibana permen karet oppan ni hail hape dang i dibaen ibana. Maoto do sude jolma dibaen ibana alai sai didok jolma i ma ibana naoto.

"Haha... diboto ho do manang aha nadihusippon na i tu au?"

"Aha ma i?" nikku huhut mangupir.

"Didok ibana ma nacemburu ho tu ibana. Dungi didok ibanama nasarupa bagakhu tu halletna hian,"

"Holan i do?" nikku.

"Didok ibana do goarmu si Gap..."

"Ssssttt... Tokka!" Toppu ma husoppol baba ni si Lasma dohot tanganhu unang ditorushon hatana i.

"Unang tangihon hata ni na hurang beres. Patutma sai mekkel ho nakkin marhusipi dohot ibana. Akka aha ma deba di hatai hamuna dagan so di si au? Nga gok ra dihatai hamu sahat tu si Barbar Losung, ate?"

"Hupfhh..hufphhh...Hum" ninna. Ageh, lasso hupalua dope hape tanganku. Nga maradu maol ibana marhosa. Bondil hian nama mata ni si Lasma ala nasai husoppol i babana i. Pola do gabe masuk si Paulina dohot si Saut tu jabu laho mamereng manang aha na terjadi di jabu.

"Hurippu..." ninna si Saut. Curiga hian pamerengna tu au. Hira namanguhumi.

"Pamereng mi, Saut! Unang baen pangalahom manimbangi manang manguhumi donganmu. Dang songon na di bagas pikkiranmi diulahon hami di son. Ido kan, Las?" Mangunduk-unduk si Lasma paboa na toho hatakki. Mekkel-ekkel ma nasida nadua dung dipatorang si Lasma kejadian sasintongna. Alai jujur ma, nga sanga au langan mamereng bondil ni mata na i daba. Sotung gabe pingsan do muse songon na di lapangan volley i, ninna rohakku.

Hubuat sigarethu sian meja. Tinggal sabatang nai nama di bagasan bukkusna. Hupagalak jala hualsip. Bukkusna i huropukkon jala ima hubaen mandanggur si Saut, asa dipahatop sidung namargulasai i. Attan hamuna namarsiturbingan i bo, adong dope ari sogot, nikku hehe sian hundulanku. Dang sala au mandok nasida sai margulasai. Ai sipata do attuk ulu ni si Saut tu dinding i. Habegean do sian jabu mallutuk-lutuk  uluna tu dinding papan i. Tikki kaluar sian jabu pe hami dohot si Lasma, humalaput do nasida rap mandao. Dirippu nasida dang tarbereng nami. Sanga do tarbereng nami nasida rempet.

"Mulak ma hami da, Las?" nikku huhut mangengkol sepeda motor ni si Saut on ala au disuru mambonceng ibana. Naung lemas hian ma ra ibana diporos si paulina nakkin, ninna rohakku.

"Eits... hampir lupa, mandarmu hape, Las!" Hubukka mandar i alai ditiop ibana ma tanganhu  mangorai asa unang pola bukkaonku mandar i sian rukkunghu.

"Boan ma. Baen di rukkungmi asa unang masuk angin ho, Bang," ninna.

Huida si Paulina hira napaborhatton si Saut tu parporangan. Sai hira nalao so pajuppang be marsogot. Ollobolloh...., ninna rohakku. Huengkol muse sepeda motor on, lalap dang mangolu. Gabe perkakas na asing do mangolu pabereng-bereng jolma on. Wakakakakakkakakakak

"Hush, Parekkelmi, Bang. Nga bagas borngin, tokkin nai tahuak manuk nama," ninna si Lasma manjonoki au. Dipajonok bohina lao mangumma hurumhu. Eh eh.. dang nalao mangumma hape. Holan namarhusip do asa ro muse au marsogot. (Bersambung)

Ho Do Tinonggor Ni Mata (Martandang 6/10)

Ho Do Tinonggor Ni Mata (Martandang 6/10)

Nga jam ualu, sai hundul dope au di alaman. Bulan tung tiur, bintang pe rarat di langit. Mangunsande ma au tu bona ni pinasa huhut mangabing gitar. Angon-angon huendehon sada ende ni Eddy Silitonga. Mama, ima judul ni ende i.

mama...
kembalilah padaku
hanyalah dirimu
harapanku, oh mama

mama...
kembalilah padaku
hanyalah dirimu
pelita hidupku

mama, oh mama...
apalah artinya
hidup tanpa
kasih sayang

mama, oh mama...
betapa nistanya
hidup tanpa
mama....

Tung marabur situtu do ilu sian simalolongku. Ndang alani siholhu tu inong namanubuhon au, alai ala ni siholhu tu si Mawan do. Sai huingot pamerengna tikki lungun panghilalanku manang tikki marsak au uju i. Malum jala tarapul ma rohakku dung huida manetek iluna. Rap dohot iluna na manetek i ma mabaor nasa lungun nang arsak ni rohakku.

Martukkol isang ma au manukkolhon gitar di abinganku. Sasahali, hasosonggoton dope au. Huida ma halilungku ala torang ni bulan na hupudihon. Huida ma tu bulan i. "Tongtong ma ingot au, Mawan" nikku marhusip tu bulan. Maraek musema matakku alani ilu alai ndang sahat manetek. Hinsat ma au naeng masuk tu jabu mamboan si Mawan di pikkiran sahat tu podomanku.

Tiiinnnn...tiiiiiinnn...! Tarsonggot au ala maradian sepeda motor ni si Saut di lambungku. Pola do tarsenggolsa gitarhu dibaen.

"Pahatop i, Bo. Na disuru ni si Lasma do au mangalap ho!"
"Ageh? Natoho do hape nidok na i?"
"Ido, toho do. Dang olo ninna ibana modom molo so ro ho!"

Di tonga dalan, disukkun si Saut ma au, "Dorma aha do dibaen ho tu si Lasma i?" ninna. Hudoltukkon ma uluna sian pudi. "Lean jo saotik dorma mi tu si Piter asa mulak roha ni si Tiar i tu ibana," ninna muse. Bah, ai natoho do hape dirippu nasida namardorma au, ninna rohakku.
"Ala ni aha do nasida putus?" nikku manukkun soal hubungan ni si Piter dohot si Tiar halletna.
"Tongma alani mokkus ni si Piter. Nga sai mandao pe halletna i sai dicocor muccungna!"
"Dicocor boha do?"
"Sai naeng diummai si Tiar"
"Dok do apala diumma?" nikku muse.
"Ai naso dibereng ho do kumis ni si Piter songon kawat?" ninna huhut mekkel.
"Geok-geok ma ra dihilala si Tiar, ate? nikku.
"Dang alani i. Gasa-gasaon si Piter naeng mangumma. Kebetulan tukkolon si Tiar nadicocor na i. Haccit ma dihilala ala hona muccung ni si Piter. Las dipastap ma tutu si Piter. Ima mulana, lam bagas ma dung leleng. Marsipanas-panasan ma nasida. Nabodari ma ujungna."

Dang terasa, nga sahat hami di Lau Pakpak. Huida mekkel si Jimmy di teras ni jabuna. Disuru hami masuk alai dang adong huida si Lasma. Dang masuk hami tu jabu alai hundul ma hami di teras i. Marisap.

"Holan lae nama nasai dihatai hami doli-doli ni parhuta on alani kejadian na di lapangan volley i, lae!" ninna si Jimmy huhut pagalak sigaretna. Diultong dungi dipakaluar hatop ala naeng tambaanna dope hatana i.

"Atlet karate muse do hape lae, ate? Ai si Bontor Sihombing parhuta nami on pe hape, murid muna do ninna ibana di Medan. Salut do iba mamereng hamuna bah, lae!" Diultong si Jimmy muse sigaretna i alai dang pola hualusi hatana i. Holan mekkel suping do au. Ekkelhi ma mangalusi ibana.

"Nadisihir hamuna do asa mabiar Nande Kapah i?" ninna huhut mekkel. Tong ma ekkelhu mangalusi. Hupasombu ma si Piter mangalusi paula so hubege. Memang dang hubege be tahe. Ala sai lulu-lulu rohakku, didia si Lasma.

Tep, huida ma si Paulina, hallet ni si Saut marlojong tu masuk tu jabu ni si Lasma inganan nami hundul. Humalaput ibana. Dijou ibana si Saut tu jabu. Marhusip nasida satokkin dungi kaluar muse ma nasida nadua. Si Paulina mulak tu jabuna alai si Saut ro manjonoki au. Dihusippon si Saut ma tu au, "Dapotton ibana tu jabu ni si Paulina, nga holan natangis ibana!" ninna nanget hian.

Hundul si Lasma di kursi rotan di jabu ni si Paulina. Unduk ibana. Hubaranihon ma maniop osangna nanget lao mamereng bohina. Hubereng ma matana naung marbosar ala nasai tangis. Huultong hosakku ganjang jala hupakaluar nanget. Hupahundul ma di lambungna. Jonok hian. Gale huhilala marnida matana namarbosar i. Unang ma nian ala ni sitaononku manang ala ni arsakhu gabe marsak dohot dongan, ninna rohakku. Ah, tahe... dang tarbaen mannutupi hinadangol ala ponjot ni roha. Hurang malo au manutupi hinadangolhu. Somalna, asa unang habotoan nasai dangol panghilalaanku, sai marhata gait ma au.

"Hut ni i, tahan do naeng kursi rotan on manea hita nadua, Las?" nikku mulai margait. "Sotung marunggang annon hita nadua gabe marsidondonan, hape adong muse namangittip dirippu hita namarulaon nahohom gabe dipasaut happung hita!" nikku huhut mekkel. Ibana pe mekkel ma. Digotil muse ma au.

Nga hampir sajom hami namakkatai i di jabu ni si Paulina. Bohi ni si Lasma pe nungnga minar be. Ditogihon ibana ma au muse mulak tu jabuna ala nga ro si Tiar mangalapi hami. Ai modom di jabu ni si Lasma do si Paulina. Marpungu muse ma hami di emper ni jabu i. Torop naposo disi ala baru mulak nasida sian gareja latihan drama Natal. Huida muse ma si Tiar digandeng baoa naasing. Berarti nga pasti be hape dipecat si Piter, ninna rohakku.

Margitar ma si Paulina di emper i dao sian hami. Naeng diihuthon si Saut marende si Paulina alai sundat ala dibereng au. Memang, pittor gatal do pinggolhu molo hubege soara ni si Saut on. Naeng muta uta au. Holan gitar ima dipaattuk-attuk si Saut. Ipe dang pas ketukanna. Tung alani ahama asa sappe lomo roha ni si Paulina tu baoa sisongon on, ninna rohakku.

"Lean majo dipiltik katua on, gitar i!" ninna si Saut ma mandok si Paulina. Ide bagus, onma nasai hupaima, ninna rohakku. Sipanggaron ma au. Ikkon hapatudu majolo tu hamu ise do sibaoadi, ninna rohakku attong. Si Saut pe gabe dipadenggan ma parhundulna. Ai ibana pe sai dietong do au dewa gitar. Mungkin ala naso binotona i ma ra margitar ate?

Sambil mamutar-mutar kupingan ni gitar, husukkun ma si lasma manang aha endehononku. Alai gabe baba ni si Saut do mangalusi.

"Ende ni Eddy Silitonga i ma baen, sarupa hian hubege soaram tu si!" ninna si Saut huhut mamiltikkon indung ni jari-jarina. Dipagalak sigaretna jala huida mangunsande ibana tu si Paulina. Hira na gabe ibana nasipanggaron daba. Hupiltik ma gitarhu jala marende ma au.

ho do tinonggor ni mata,
ho do tinodo ni roha,
sadari pe so huida,
mansai lungun do huhilala.....

di naso panagamanku,
borhat ho lao tu bariba
mansai lungun huhilala,
ai ho do nahuparsinta.....

molo huingot naung salpu,
tikki au rap di lambungmu,
dang tardok au manang aha
alani holong ni roha....

Dung sae huendehon ende i, huhusiphon ma tu pinggol ni si Lasma, "Ende i ma hatakku tu ho, Las!" Huhilala ma dihaol ibana gottingku jala di sandehon uluna tu au. Las hian rohakku. Naeng marsurak au alai huida ma humaliang.Nga lam torop be jolma manghaliangi hami. Adong muse do ina-ina na gabe kaluar sian jabuna be alani ende i. Marmandar-mandar nasida. Ngali do nian pangullus ni alogo on, alai pos rohakku, ikkon sai las huhilala ala adong si Lasma. (Bersambung)

Tangis di Sihabunian (Martandang 5/10)

Dang holan bola volley i, podang na i pe ditinggalhon Nande Kapah do pattik di tano inganna hundul nakkin. Hubutbut ma podang i laos marikkati ma Nande Kapah. Dao hian ibana marikkati. Hutailihon ma tu pudi, nga diabing doli-doli donganna sahuta be tu lapangan. Dihaliangi natorop ibana. Huida ma mansai langan ibana. Manorus patna nang rukkungna pe. Marsalon bibirna. Huida ro ilu ni si Jimmy alani biarna atik boha si Lasma. Hutiop ma abara ni si Jimmy ibotona i, mandok asa marpos ni roha. Husuru ma si Saut manippan podang ni Nande Kapah tu lapo ni si Reken jonok ni lapangan i.

Dung hulean minum, sadar ma si Lasma di abinganku. Sai didappoli si Jimmy dope patna. Hissat ma ibana songon namaila-ila. Dang sadia leleng, normal ma suasana di lapangan. Alai sai di lapo ni si Reken i ma si Lasma hundul. Tontu, au pe attong di si ma mandongani ibana. Mauliate ma di Nande Kapah. Uhhuy..... Anggo au pe daaaahhhhh maradu so hutonton be namarvolley i. Tarhona dope naasing berengon molo adong bintang film di jolo niba?

Sidung partandingan, ndang marnamulak be dope akka natorop na di lapangan i. Nang pe nga bot ari, sai marpungu dope akka naposo na adong di si. Huida anakboru parhutanami manghaliangi si Jimmy dohot donganna. Ganteng do si Jimmy on jala burju. Alani kejadian nakkin, gabe diboto anakboru i do naholong rohana tu ibotona si Lasma. Parholong do si Jimmy on, ninna roha nasida. Ima na hubege dipandok nasida, gabe torop anakboru i namarlomo ni roha tu ibana. Ia tu iba so adong naolo halakon, ninna rohakku do nian. Las do rohakku mamereng anakboru parhutanami na super agressif i.

Bah? Si Lasma pe hape nga sai dihaliangi doli-doli parhutanami. Hupadao majo sian lambungna on. Mulak majolo au tu jabu nami asa husippan podang ni Nande Kapah on, ninna rohakku.

Duapulu menit nasida hutinggalhon di lapo i, sai dihaliangi doli-doli i dope si Lasma. Huida ibana marsijalangan dohot si Urdot, sibau hosa i. Pandok ni barita, mate toppu hian do hallet ni si Urdot on tikki marsiummaan nasida. Ima namabaen ibana stress, maradi ma ibana kuliah gabe mulak tu huta.

Ageamang jo si Urdot on? Las barani ibana marhusip tu si Lasma di jolo ni natorop ate? Nga gurgur huhilala mamereng. Alai gabe mekkel si Lasma dung marhusip nasida. Aha ma ulaning husip-husip ni nasida. Nga naeng hudanggur si Urdot dohot batu nabalga hian on, naso tarangkat au do. Tep, huida ma si Lasma mandapothon au jala hundulma di lambungku. Alani penasaran au manang aha nadihusippon i, husukkun ma si Lasma.

"Didok ibana parcemburu ho, Bang!" ninna si Lasma. Mallasak ma huhilala. Pasti dang diboto hamu manang alani aha, kan? Ala na dijou na i do au abangna. Alai dang pola hupatudu lasni rohakki. Biasama akka pemain lama. Wakakak
"Nagodang nabinoto ni si Urdot i," nikku huhut manailihon si Urdot namekkel suping.
"Alai, olo do toho i. Memang nasogoan rohakku molo dijonoki doli-doli naasing ho, Las. Nangpe nambura dope hita marsitandaan" nikku mandok sian ias ni rohakku.
"Jadi na toho do dang ditanda ho au? Tikki SMP kalas sada au, kalas tolu ma Abang,"
Mangupir au patudu natoho do dang hutanda hian ibana.
"Kan hallet ni si Mawan hian do, Abang tikki SMP?"
Margak-argak ma au ala didokkon au hallet ni si kariting mosok i. Wakakakaka... Molo dang ala naung ro mobil jemputan nasida, olo nama au mekkel tolu ari tolu borngin ala didok hami namarhallet. O, tahe... si kariting mosok.
"Ido hubege hami kabar sian kakak kelas nami, Bang!" ninna musema.
"Ingot ma hape ho di 5 taon naung salpu ate?" nikku huhut marningot si Mawan donganhu na luar biasa huhasiholi i. Toppu masihol hian au tu ibana. Nungnga hampir onom taon au ditinggalhon donganki. Didia do ho Mawan, sai ima di bagas rohakku. Tikki dakdanak hami, ala ni takkanghu, sai jotjot do au hona balbalan. Dilissingi oppunghu hian do tanggurungku dohot sapu maradu marbogas manang sappe marmudar. Ditijuri si Mawan on hian ma tanganna jala diapushon ma tijur i tu tanggurungku. Huingot dope i, Mawan nalagu. Huingot do i sude. Dohot nalao hita tu Kabanjahe mangalului omakku.

"Masihol hian au, Mawan!" nikku. Naso panagamanku tarjouhon au goarna tarbege ni si Lasma. Dibereng ibana huapus ilukku. Dihukkupi ibana ma bohikku asa unang diida natorop i na ro ilukku. Alai sai munjal-unjal ma abarakku ala hasosonggoton au. Disarat ibana ma tanganhu tu samping lapo ni si Reken. Sai maraburan dope ilukku.

"Masihol hian au tu si Mawan lobi sian siholhu tu inong namanubuhon au!" nikku hira namangalu-alu tu si Lasma. Dilap si Lasma ilukku.

"Annon bodari ma patorang tu au, Bang. Ikkon ro abang, molo dang ro abang tung so boi au tarpodom bahenonmu. Ro ma Abang da?"

Nakkok ma ibana tu mobil namanomu nasida. Hudada nasida. Huingot muse ma tikki parborhat ni si Mawan sian huta nami on. Marikkati au mangalumba asa dohot ma nian au diboan nasida. Haccit hian hutaon di huta on, Mawan...! (Bersambung)

MARTANDANG-4 (Nande Kapah)

Nande Kapah (Martandang 4/10)

Pertandingan bola volley nga dimulai antara parhuta nami tu parhuta Laumil. Seru hian do pertandingan i. Si Saridin, donganhu tikki sikkola SMP hianma playmaker ni par Laumil. Mansai maol do dipatalu parhuta nami nasida. Babak parjolo 21-20, paduahon 20-21 dohot napatoluhon 21-19. Monang tipis ma parhutanami. Ima pertandingan naparjolo sahali. Partandingan paduahalihon, monang do parhuta Laumil mangalao par Lau Pakpak. Menang mudah. Hebat do memang permainan ni nasida.

Onma pertandingan terakhir. Parhuta nami mangalo parhuta Lau Pakpak, huta ni si Lasma. Jut hian rohakku ala meret si Lasma sian lambungku. Gabe lao ibana tu akka donganna sabola pemain ni parhutana. Marsurak-surak nasida manambai semangat ni parhutana i. Au sai sip do di pudi ni parhuta nami. Sai ibana do hupabereng-bereng marsuraki. Bagak hian ibana huida. Dongan sahuta na di lambungku pe didok do songoni. Akka anakboru ni parhuta nami pe mangiburu do tu si Lasma.

Sidung sababak. Talu ma parhuta nami 21-4. Sandok digosa do parhutanami daba. Alani nasai tu si Lasma ma ra mata ni akka pemain ni parhuta nami i. Manang alani na lam semangat i do parhuta nasida dibaen surak-surak ni bidadari i. Manang ala ni aha pe i, sandok maila hian do huhilala hami ala holan dapot poin 4 do hami. Jala ikkon akkuan nami do malo nasida martaktik. Dang sude pemain nasida i nakkin na dohot mangalo par Laumil. Si Jimmy, playmaker nasida i pe, on dope dohot.

Babak paduahon dimulai. Mallasak smash ni si Saut mambaen poin pertama di parhuta nami. Alai, habang ma dao bola volley i. Disuru ma dakdanak mambuat bola naung danggur i. Hape...? Marikkati ma mulak dakdanak i tu lapangan. Langan bohi ni dakdanak i. Sude ma si bereng aha namanginsombut. Marlojong muse ma anak boru parhuta Lau Pakpak i. Gok na malitondi marnida Nande Kapah mangalelei najonok tu ibana jala maniop-niop podang naganjang. Doli-doli namarvolley pe torop do namangirput lao martabuni.

Dang pola nian dilelei Nande Kapah jolma i sappe dapot. Alai marnida podang namarsillak i, sude do humitir. Molo diboto hamuna podang ni Pangeran Pattimura, songonima bentuk ni podang i. Natajoman i, ninna si Saut muse manambai informasi taringot tu Nande Kapah narittik i. Ala ni tajom ni podang i, pola do didok si Saut, so hona dope bona ni pisang i tinaba, nga maruppak ala tajom ni podang i. Ima pandok ni si Saut.

Hundul ma Nande Kapah dao di pudi ni lapangan i. Dihunduli ibana bola i alai sai diondam-ondamhon ma podang i hira nalao manallik ise namanjonoki ibana. Dung sadia leleng, dibaen musema keputusan asa ditorushon pertandingan. Ai dao do inganan ni Nande Kapah i sian lapangan. Paling ma molo dismash olo gabe habang bola i tu ibana. Adong dope bola sada nai. Ima dipakke nasida.

Ala nasai mabiar-biar nasida lao mansmash, gabe hurang ma tabo ni parmainan. Mostop ma dihilala si Saut, dismashma sagogo ni gogona jala disengaja ma tu Nande Kapah. Dibuat narittik i musema bola i. Mabiar situtu jolma na di lapangan i. Hinsat ma sahalak doli-doli parhutanami lao mangelek Nande Kapah asa dilean bola i. Alai mulak ma ibana sian tongan dalan ala dang tuk habaranianna dung hinsat narittik i sian hundulanna mandapothon si doli-doli i. Marlojong ma ibana jala malitondi. Langan ni bohina nga hira hunik.

Manang na sian dia ma habaranianku hinsat sian hundulanku. Marsurak ma akka anakboru parhuta nami asa unang pola hudapothon Nande kapah. Lokma, unang pola buat be bola i, sai ninna nasida. Hutailihon muse ma tu punguan ni halak si Lasma. Unang ito, sai ninna si Tiar hallet ni si Piter, huhut diharat jari ni tanganna. Sai ditunjangi ibana musema tano ingananna jongjong mangido asa unang pola hubuat bola i.

Nga sahat au satonga dalan. Hubegema marsurak si Lasma mangorai au. Oh, yes.., ninna rohakku di bagasan. Alai hutorushon ma manjonoki Nande Kapah. Marlojong ma si Lasma ro sian pudikku lao manarik au mulak. Lima meter nai nama au sian podang ni Nande Kapah. Sai tu podang na i ma matakku. Atik boha mangamuk annon ibana, nga tong huida adong bona ni kopi di lambungku lao manangkis podang i. Hehe ma Nande Kapah. Laos di parhehe ni Nande Kapah i ma madabu Lasma di pudikku. Pingsan ibana. Gabe dang diida ibana be nanilean ni namboru naso waras i bola i tu au. Laos mulak ma ibana. (Bersambung)

MARTANDANG-3 (Sai Tu Ho Rohakku)

Sai Tu Ho Rohakku (Martandang 3/10)

Mangullus alogo nanget. Ombun pe manghukkupi bulan tula. Mellep sinondangna satokkin. Tung pe songoni, anggo bohi ni itoan i takkas hian do huida. Hira namarsinondang bohina. Ganjang ni obukna saabarana. Potpot alis matana. Igungna pe mancung. Osang nang hurumna pe naulian. Bibirna... Ah... dang tarpatudos au be. Songon bintang filim ma ibana huida. Hira si Meriam Bellina. Soarana pe nalambokan di sipareon.

"Inum kopimi, ito, bissan las. Molo ngali, hurang tabo annon," ninna si...?

"Ise do nakkin didok hamu goarmu, ito?"

"Si Lasma, ito!"

"Boru aha tahe didok ito nakkin?" nikku.

Dipaboa ibana ma manang boru aha ibana.

"Berarti marpariban do hita!" nikku hatop.

"Sian dia ma dalanna asa marpariban hita?" ninna huhut mekkel suping. Amangjo uli ni ekkel na i, oppunge?

"Ido, ikkon marpariban do hita!" nikku muse marjugul.

"Boasa? Hahahaha....!" mekkel ibana. Huida muse ma iponna nabontar i sumalin nama bagakna daba. Layak dijadikan model pasta gigi, ima menurut au.

"Molo tu anakboru nabagak songon ho, ikkon marpariban do au," nikku.

Dang maarnabosan ibana pabege-bege au makkatai. Nungnga sajom hami namakkatai i, sai mekkel-ekkel ma torus ibana ala godang ni hatakku. Dang suda dope ekkelna, nga huhatai muse na geok dihilala.

"Nga boi hamu gabe parubat-ubat, bah!"

"Memang parubat-ubat hian do au, Las!" nikku mandok goarna. Hupasomal mandok goarna asa ibana pe songoni tu au. Dung i, hatop ma hami akrab. Pittor olo ma ibana manggotil au molo apala geok hian dihilala ibana ceritakku. Huceritahon muse do porsukni partinaonanku tikki di bus Sampri dohot oppung namatua i. Margak ibana.

"Nga bagas borngin, sogot muse taulahi, da?" ninna huhut mangampehon tanganna tu pathu satokkin.

Ima parjuppangan jala partinandaan nami parjolo sahali. Holan songoni dope. Molo akka donganku na tolu halak nungnga leleng nasida marsitandaan dohot hallet nasida be. Huhut makkatai pe au dohot si Lasma, sanga do tarbereng au si Saut dionjarhon halletna si Paulina. Sai disossotton si Saut attong muccungna tu bohi ni itoan i. Dionjarhon ma tutu. Hubege muse do mallutuk ulu ni si Saut tu tembok i. Marbuttul do ra uluna i. Molo si Piter dohot si Tiar, dang habegean anggo hata nasida. Alai, dung di pardalanan lo mulak, huboto hami ma naung diputushon si Tiar si Piter. Paet ni pogu ndang sadia martimbangkon parniahapan ni si Piter borngin on. Biar do nakkin rohakku marnida hagaleon ni si Piter dipardalanan i. Apalagi pas di jembatan nakkin. Sotung laos ditimbung do annon tu Lae Renun i, sai ninna rohakku.

Suhar sian parniahapan ni si Piter, rohakku nga sai naeng humatop pajuppang dohot si Lasma. Di gareja parmingguan pe nga sai tu ibana be rohakku. Ende huria pe nga asing be di sipareonku. Soara ni si Lasma nama nasai habegean. Hira nasai dijou au huhilala tu lambungna. Nanggo otik dang hubege be jamita. Hubege muse adong namarukkor. Bah, si Saut on? Haru tikki marende dang lomo rohakku mambege soarana, apalagi ma soara ni ukkorna. Targanggu iba menghayal dibaen. Hutatap muse ma humaliang, dang holan ibana naung modom. Hampir sude naposo baoa modom. Nga marradakan be sude dongan hira na hona tembak di parporangan. Dang diparrohahon namarjamita be akka naposo namodom on ala torop ni parminggu di bulan Desember. Parsikkola dohot mahasiswa hira na wajib do patudu dirina tu gareja. Asa didokkon halak nasida jolma naburju. Songoni ma molo manurut pamerenganhu jala memang songoni do dipandok hami molo tikki marpollung hami naposo. Anakboru i pe songoni do i, ninna akka dongan. Nasekalian memajang diri do i, ninna muse. Isss.. holan dihatai anakboru, pittor tu si Lasma rohakku.

Di pardalanan mulak sian gareja hubege ma adong annon pertandingan volley di huta nami on. Doli-doli ni parhuta nami mangalo doli-doli parhuta na asing. Nangpe dang berbakat au marvolley, alai lomo do rohakku manonton namarvolley. Somalna, sai torop do anakboru namanonton apalagi di tikki libur sikkola songon on. Masiboan pendukungna be do ganup huta na ro. Sadrion adong ninna dua huta na ro. Sian Laumil dohot sian Lau Pakpak.

Hah! Lau Pakpak? Mallobok ma taroktokhu umbege goar ni huta i. Huta ni si cantik manis, didadari dari khayangan. Oh Lasma... Naeng marinjaki au. Nga longang oppungku mamereng au nasai busisaon. Dang tarallang au indahanku. Memang loppan pe nian holan ikkan asin muse do. Kepala batu nabondil-bondil i. Hupanonoti mata ni ikkan asin i makkatai tu au. Ro do si Lasma? Ninna kepala batu i manukkun au daba.

"Oi, Pian...! Ro do par Lau Pakpak. Si Lasma pe huida do nakkin ro!" ninna si Saut manggora au sian pintu ni jabu nami. "Pahatop ma namangan i!" ninna muse. Las hudanggurhon ma kepala batu i. Eh.. holan tinggal uluna nama tahe.

Sabotulna, nga naeng marlojong au tu lapangan volley na di toruan ni huta nami. Naeng hubaen lari saribu lao mandapothon si Lasma. Alai, pura-pura kalam ma au. Anggo rohakku, nga sai naeng marinjaki. Apalagi dung hubereng ibana marbaju na mera. Torop doli-doli di lambungna. Hira na tu ibana ma mata ni akka doli-doli salapangan i.

Sanga do gale panghilalaanku ala so adong responna tikki huhirap ibana. Hudapothon ma tu ingananna hundul. Lam mallobokma taroktokhu dung digeser hundulanna jala disuru ibana asa hundul au di lambungna. Mansai jonok muse. Molo rap iba dohot bintang, gabe dohot do iba songon bintang makkirdopi. Hutangi-tangi do akka natorop i makkatai. Goarhu pe sai dipandok nasida do. Anggo au tahe...(Bersambung)