Mardrama Natenggen

Diingot hamuna dope Catatanku naberjudul: Ale hamu akka ama-ama, dappol hamu inattamuna manang Marunggang tikki marfolksong? Adong do di si tarsurat goarni donganku si Mawan. Oppung ni si Mawan on hian ma mambaen au malo mandappol. Jala si Mawan on hian ma donganku marfolksong. En wan... en tu... en wan... en tu. Alai molo naujui, dang holan donganku marfolksong si Mawan on. Mardrama Natal pe hea do ibana pasanganku. Ujui, drama hatutubu ni Jesus. Si Mawan ma gabe si Maria, au ma si Josep. Si Mawan on do namamillit au hian gabe pasanganna. Bagak do nian si Mawan on, alai tu si Chika do lomorohakku tikki i. Malas do au latihan drama i, ala sai mardandi si Chika tikki i.( Dung di Jakarta onpe asa hubege sian si Mawan sandiri, nalomo do hape rohana hian tu au. Wakakkakakakaka.... dang tartahan au dang mandok on, Mawan, geok huhilala daba, dang hurippu lomo roham tu au, qiqiqiiqkkk)

Ala nasai malas i au latihan drama, dielek si Mawan ma au asa ringgas latihan. Hutuhor anggur sagalas molo nga sidung latihan, ninna. Amangjo tahe, SMA dope iba nga sai minum anggur vigour uju i. Hupangido muse ma asa sebelum latihan dilean anggur i tu au. Nga somal be attong au nalatihan on jala nga dapot au be anggo peranhu di drama i. Sogot nama penampilanna di pentas.

Molo di huta-huta, attar jarang dope adong hiburan. Holan adong acara mar Natal, ribur do di huta. Dohot do dongan niba Muslim manonton. Mansai riburma tahe. Di jolo ni gareja i do dibaen pentas. Nangpe perayaan agama, alai akka namarhallet-hallet pe di sonma kesempatan lao pajuppang dohot halletna be. Songoni muse do akka dongan niba nadapot peran di drama on. Holan au dohot si Mawan ma naso marhallet. Tikki mangganti pakkean kostum drama, roma si Rikson mamboan botol minuman tu pudi ni pentas. Asa songon na garang annon ho, Fian, nion nah, inumma nanggo apala sagalas, ninna ma tu au. Hudorguk ma tutu.

"Boasa godang diinum ho, Fian?" ninna si Mawan ma tu au.

"Ah, holan sandorguk do." Nikku mangalusi si Mawan. Alai, paitte jo tahe? Ai dang anggur hape nahudorgukkon nakkin. Kamput do jala sabotol hape nakkin! Mordong hian ma huhilala daba. Dipahundul si Mawan ma au jala dikipasi songon namakkipasi jagung bakkar. Nga hodok hian be huhilala. Sogo hian huhilala baju ni si Josep on, nikku ma naeng mambukka. Ikkon pakkeonmu do bajumi asa suman mardrama, sai ninna si Mawan ma mangelek au. Sai dibaen si Mawan do telapak tanganna tu hurumhu tikki i. Dilap ibana do hodokhu di rukkunghu dohot tanganna i. Matonu do baju i alani hodokku, daba. Diombusi muse do rukkunghu asa moru mohopna huhilala. Boi dope ho jong-jong, Fian? Sai ninna ma tu au. Boi do nian au jong-jong. Alai molo mardalan nga maol be huhilala. Sai songon naso olo pathu naduai marsijoloan. Songon namarsipasangapan pathi daba. Homa parjolo ninna siamun tu sihambirang. Songoni nang pathu hambirang, homa parjolo ninna tu pathu siamun. Molo rappak siamun dohot hambirang, nga songon pocong be mangakkat, ate? Wakakakakkakaka

Pasma giliran nami maju tu jolo. Anggo on pe daaaaaaaahhhhhh...

Molo tuntutan ni drama i, si Josep do manogu si Maria, ia on asing. Disarat si Mawan nama au songon namanarat dakdanak namardandi. Tardege au musema bajuni si Josep on, dangbe, naeng matukkap ma au daba. Gogo ma muse digotil si Mawan au asa hudokkon dialog songon na di naskah i. Selesai ma tutu hudokkon naniajarannai. Selesai ma dialog nami alai sai so ma au di jolo. Ditutupma layar, alai sai manikkir ma au sian layar i. Sude panotton mekkel-ekkel daba ala hupakaluar ulukku sian layar i. Naeng hulambaihon ma tanganku, hape pittor toppu ma adong manarathon au sian bagas pentas. Eitsss... si Mawan do hape namanarathon au. Marunggang ma hami nadua di pentas, marsidondonan ma hami nadua. Tuani do dang haidaan ala naung ditutup layar i.

Tangis ma si Mawan. Dang tarbereng au ibana tangis daba. Digotili ma au muse. Tarsongon robotma au, molo digotil ibana au, sai hudokkon ma naskah ni drama i. Longang ma rohana. Mekkel ma ibana ala hudokkon naso pola tenggen be au. Babak dua annon, ikkon lancar sai nikku ma.

Babak kedua dimulai. Hutogu ma si Mawan manuktuki jabu parbornginan. Alai parjongjongku dohot pardalanku nga normal be nian, alai naskah na lupa ma au sude daba. Digotil ma au. Haccit nai sai nikku ma tutu. Dihusippon ibana ma muse nanget mangajari naskah drama i.

"Betama tadalani, Maria. Ai nungnga jonok be huta Betlehem" Nikku ma tu si Maria. Attar huhaliangi hami ma layar i. Dungi juppang musema sada jabu, hutuktukima nalao inganan parbornginan sappe tu jabu na patoluhon. Hape di jabu patoluhon, tuan rumah diperankan si Rusman Galingging, anak ni parlapo di hutanami. Dung hutuktuk jabu nai, dibukka ma pintuna.

"Ai aha i?" Ninna si Rusman ma manukkun.

" Gudang Garam Filter sabukkus!" Nikku ma daba. Sudema margak-argak akka namanotton. Si Mawan pe nian mekkel do.