Makkail

Tung mansai sogo do roha molo nga pola tarhunduli iba sisa ni permen karet. Pittor lokkot do ibana di salawar niba jala maol muse do tanggal nangpe nga binaen miak tano. Di lapo ni si Reken, di bangku nai, attar songon najotjot do terjadi songon i. Margait alai keterlaluan.... Sanga do adong namarbada alani sisongon i. Ai ise naso jut rohana tahe apala pas naeng lao martandang nama tu huta naasing hape nga margulu-gulu permen karet salawar niba. So sundat holan tolu do salawar niba lao martandang sude nga hona permen karet on. Kurang ajar.....ikkon huittip jolo manang na ise do namangalokkothon permen karet i, ninna rohakku.

Lam leleng hupaihut-ihut, ternyata pelakuna attar songon torop do. Hampir do sude dongan na ro tu lapo i. Alasan ni nasida pe hampir sarupa. Balas dendam, ala nga sude halaki hona. Sian sude halak i, holan sahalak ma na sai jot-jot mambuat permen karet sian bangku manang kursi. Si Urdot, donganku kompak tikki SD-SMP. Alai dung SMA pulik be do hami. Au di Sumbul Nabalau, ibana di Medan. Sanga do kuliah di Bandung ibana dua taon. Mulak sian Bandung songon na marsahit do ibana. Molo parhuta nami mandok nga hurang roha ibana. Tuani ma burju si Urdot on paiashon permen karet sian kursi i, ninna si Reken, parlapo i.

Molo manurut au pe nian burju do si Urdot on. Alai attar jarang do ibana makkatai. Dang sude jolma pola dialusi ibana. Alai alani longang ni rohakku mida ibana nasai papungu permen karet on, husukkun ma ibana.

"Nalao tu aha do bahenonmu permen karet i, Urdot?"

"Oh... naeng pakkeon do on nalao makkail, bah," ninna ibana naso panagamanku alusanna.

"Bah, pakkeonmu nimmu makkail?" longang situtu rohakku attong. Alai akka dongan i nga sai marhusipi.

Hubotoma napakkail-hail do hape si Urdot on. Jala manurut informasi sian dongan huta, ibana ma na jotjot dapotan. Adong muse do namandok attar palobihon: Si Urdot on do napasudahon dekke ni Lae Renun. Sandok lomom mangido sipiga kilo porlu di ho, botari pasti adong ma i. Songon i ma anggo hata-hata napalobihon nabinege. Memang akka pargait do parhuta nami on.

Au pe nalomoan rohakku makkail. Sogot ari minggu songon najinanjihon ni akka dongan i mulak marminggu, ikkon dohot au makkail dah, ninna rohakku attong. Asa hubaen jolo oppanni hail i pakke permen karet. Sude do dongan i naeng mambaen songon resep ni si Urdot on. Maradu adong do na manuhor permen karet sian lapo i sagodang ni godangna. Dihilhili mai hatop-hatop asa boi pakkeonna sogot. Dipalleani tu dakdanak deba. Nah.. allangi hamu permen karet on. Ampas na baen tu palastik on, unang bondut da? Gabe las rohani akka dakdanaki.

Bah... kosong gareja. Holan hami nadua ma naposo baoa namarminggu. Au dohot si Urdot. Ai na tudia be do akka dongan on? Atik naung lao do nasida tu pakkailan? Bah nga sala be on, nga dijoloi be au. Habis ma annon dekke i dibaen nasida. Sai holan na tu pakkailan on ma rohakku. Nga sai naeng hurang hatop huhilala asa amen-amen.

"Pittor naeng tudia ho, kawan, ai aha na niadum?" ninna si Urdot tu au ala humalaput au naeng mulak dung amen-amen. Longang do au panukkun nai. Molo nasomal dang hea si Urdot on parjolo makkatai. Asing sahali on. Au pe attong hupananget ma mardalan. Rap ma hami mardalan nanget-nanget. Saganjang dao ni pardalanan ma hami makkatai. Lam takkas ma huboto dang nahurang roha hape si Urdot. Daong.

Dung marganti baju jala mangan arian, laho ma hami tu pakkailan, tu Lae Renun. Maradian satokkin di bona ni kopi na di rura i. Hupaima ma ibana di topi ni dalan i. Dang sadia leleng rupani, ro ma ibana mamboan palastik na birong. Diuduti hami ma pardalanan nami. Tohoma tutu... nga songon pasar be anggo torop ni namakkail di sunge i. Bah nga habis be dekke i dibaen halakon. Aha be nalao hailonku?

"Boha, Togu, nga godang dapot?" nikku manukkun dongan na hubolus hami.

"Nanggo sada pe so dapot dope, hape nga mulai sian jam lima hami di son!" ninna si Togu mangalusi sambil pature-ture hailna namarlulut. Mutung bohina.

"Beta tu sadaan ma hita nadua asa songon nalinggom otik," ninna si Urdot songon namarhusip.

"Alai ingot janjitta i, da, molo nga dapot opat mulak ma hita!" ninna ibana muse nanget.

"Olo, bah, pittor mulak pe hita!" nikku mangalusi.

Ditikki na makkail on, sai holan nanaeng mekkel do au mangida sude akka dongan naung jumolo ro tu sunge on. Nanggo sada dang adong dope dapotan. Si Urdot pe songon na mekkel suping. Dibereng ibana tu au.

"Nadirippu halaki do haroa dang diboto dekke i dia panganon dia naso panganon, ate? Haru jolma pe diorai do mambondut permen karet, ate?" ninna muse sambil mekkel. Anggo au nga hassit butuhakku holan na manahan ekkel.

"Dapot....!" ninna.

"Au pe dapot!" nikku muse. Sude do jolma na adong di si sibereng tu hami. Lam semangat ma au na makkail on. Songoni nang akka dongan i. Nga tikkina haroa pangallang na saonari, ninna roha nasida be.

"Dapoooooot!" nikku muse gogo dang sadia leleng. Balga nai ninna rohakku dibagasan.

"Umbalga dope on!" ninna si Urdot.

Naeng do nian hulanggar perjanjian nami nadua. Sai na hurang godang dope huhilala alani taboni namanarik hail i. Dipature hami ma hail nami. Oppan nami pe di bolokkon ma tu aek i. Alai dang pittor mulak hami. Hundul dope hami nadua dung sidung maridi, marisap di ginjang ni batu na bolon i huhut paida-ida akka dongan naso dapotan. Adong ma on naung ngol-ngolan. Adong ma on deba naung ditos-tos murukna gabe diambolokkon hail nai tu sungei. Adong ma i deba namamursikkon dekke i.

"Puehhh bursikma i, tung sada pe so dapot... ia si Urdot dapot," ninna nasida marungut-ungut.

"Mardikkan do haroa begu ni aek on tu si Urdot," ninna na asing. Anggo au dang huboto be mangorom ekkel hu. Sahat tu nakkin, rahasia nami dang boccor dope on. Nanggo otik dang dope. Sadari on ma huboccorhon ala nga melalui persetujuanni si Urdot naung gabe happung di hutanami. Dang toho dibaen ibana permen karet oppan ni hail na. Gea do dibaen ibana oppanna. Alai dung sian i, ias ma lapo ni si Reken, dang hea be adong kejadian nalokkot permen karet di ihur..... eh di salawar ni dongan na ro tu lapo i. Mauliatema Urdot.